政情：驚輻射多過恐襲 張俊勇拒日赴美
日本東北大地震已經過咗六年，唔少人都係唔敢去重災區福島縣，近日有旅行社復辦福島團，但中華總商會會董張俊勇（Thomas）就依舊話怕怕，今個暑假寧願帶兩個囡囡去美國讀暑期班，仲話唔怕恐襲喎！
地震前一年遊日幾次
Thomas話，大地震發生前佢哋經常一家大細去日本旅行，一年閒閒哋都去幾次。不過地震後佢一直擔心輻射問題，六年嚟都盡量唔去日本，就算去都改去距離較遠嘅沖繩，但就唔敢帶同兩個寶貝女同行。
唔去日本，仲有好多地方可以去玩。Thomas就話暑假期間全家會去美國旅行，仲為兩個囡囡報讀咗暑期班。佢明言唔擔心恐襲，認為現時嘅恐襲多數喺歐洲發生喎！