政情：胡紅玉自爆大學時期狂走堂
競爭事務委員會（競委會）主席胡紅玉過去出任唔少公職，涉獵嘅範疇廣泛，皆因佢有法律專業知識。不過佢接受香港律師會一份刊物訪問時，自爆喺大學時期不斷走堂，更曾經想一走了之放棄添，認真估佢唔到喎！
胡紅玉話，喺大學修讀法律時不斷走堂，因為覺得所學嘅知識單調沉悶，全無趣味可言，佢仲一度想放棄，仲試過向聯合國求職企圖一走了之。不過聯合國回信畀佢，話嗰份工需要有碩士學歷或兩年工作經歷，先令到佢知道自己唔夠班，驅使佢安安分分讀完書，後來亦攞到律師資格。
冀為競委會訂下工作基調
結果胡紅玉終於都係喺法律界工作，執業期間亦令佢對法律有番啲興趣，體會到法律能夠解決一啲問題，對客戶嘅影響更可能係一生一世添。至於現時競委會嘅工作，佢就表示希望任內能夠為競委會訂下工作基調。