政情：地盤切燒豬唱詩歌 郭振華：聞所未聞
早前有基督教教會上載為一個地盤項目舉行拜神儀式嘅片段，除咗大家熟悉嘅切燒豬傳統儀式之外，仲有唱詩歌嘅環節，夠晒有創意。早前喺一個場合見到香港工業總會副主席郭振華（Jimmy），佢就話首次聽到咁嘅做法，直言聞所未聞添！
參加過多項開工儀式
做過深水埗區議會主席嘅Jimmy從事地區工作多年，參加唔少大大小小嘅開工儀式，佢話香港地盤常見嘅儀式只係拜吓神，切吓燒豬，但就從未見過有唱詩歌呢種西方宗教形式。今次呢個教會地盤唔止採用香港傳統嘅打鼓同切燒豬儀式，又有唱詩歌，夠晒包容。雖然令人覺得新奇及難以置信，但都幾抵讚吖！