中環出更：柯仔驅霉 用七色花水抹身
如果要洗走霉氣，多數人都會選擇用碌柚葉沖身，不過立法會議員柯創盛（柯仔）就話會用七色花水抹身，即係將七種唔同嘅植物放落水中，再用嚟抹身洗走霉氣，因為呢個係潮州傳統。柯仔話，唔認識呢個傳統嘅同事見到都抓爆頭喎！
柯仔話，佢每次去完殯儀舘都會咁做，抹完先返屋企。佢媽媽更教落，要將啲水用力潑出去，唔知係咪代表趕走霉氣呢？
指藍田邨外牆飛龍為鎮水怪
講講吓，柯仔又講起以前藍田邨外牆嘅彩繪飛龍傳說。佢話官方解釋條飛龍係為咗紀念第五百座公屋而畫上，但區內居民就流傳係為咗鎮住水怪。自幼喺藍田長大嘅柯仔都相信係為咗鎮住水怪嘅講法，仲話年幼時曾經喺晚上望向該條飛龍，見到條龍雙眼識得發光，佢仲唔止一次夢見飛龍喺上空打水怪喎！見佢講到好似真嘅一樣，會唔會係佢日有所思，夜有所夢咋？
卓妮