中環出更：陳細潔愛犬怕黑 傳心師幫唔到手
動物有病或舉止有異唔識表達，唔少人會搵動物傳心師幫手，但傳心師係咪真係可以同動物溝通，就真係天知道，早前就有報道揭穿傳心師嘅所謂傳心伎倆。出名係愛犬之人嘅保良局主席陳細潔（Abbie）都試過搵傳心師，事關佢有隻狗非常怕黑，經常出街去到某啲地方就唔肯行兼且要抱抱，佢請類似傳心師嘅人嚟睇過，但係隻狗依家都仲係咁怕黑喎。
Abbie話，隻狗通常喺墳場附近就會有異常表現，後來朋友介紹咗個洋人傳心師畀佢，對方一見到隻狗，摸都唔使摸就話隻狗曾經由一個年紀較大嘅女人養過，隻狗好唔鍾意個女人。Abbie諗起之前的確有個年紀大嘅女家傭照顧過愛犬，而嗰個家傭又真係唔鍾意狗。不過個傳心師講完就算，都冇提出解決辦法。
陳正欣話相處耐就溝通到
究竟人類係咪可以同動物傳心呢？養過唔同寵物嘅保良局總理陳正欣認為難以考究，其實人同動物只要相處得耐，都可以基本溝通到。保良局副主席馬清楠都有養狗，佢話阿仔緊張狗狗仲多過緊張佢，事關隻狗年事已高，相等於人類百幾歲。個仔去外國讀書後，每次打電話返嚟第一時間都係問隻狗嘅情況先，阿仔仲諗定萬一愛犬過身，要將佢最愛嘅毛氈燒畀狗狗喎。
講番呢日嘅活動，係保良局舉行關聖帝君寶誕祭祀典禮，馬清楠代表主祭，進行三鞠躬禮、降神禮等儀式，以紀念保良局成立初期每逢審理案件、立誓領育及嫁娶等，均會於關帝像前進行以示公正。
卓妮