早前一名七十五歲婆婆以一蚊出售紙皮，而被食環署職員以非法擺賣控告嘅事件，期間有食環署前員工爆料，話署方內部有「交數」嘅情況。多名立法會議員尋日喺一個委員會上質疑係咪有要求前線人員「交數」，雖則署長劉利群矢口否認，仲多次強調小販管理嘅成效唔係以檢控數字作評核，但最後委員會都通過咗何俊賢（高佬賢）嘅動議，要求食環署內部若有「交數」情況，需要禁止有關做法，擺明係唔信劉利群講嘅嘢喇！
