立法會政府帳目委員會今日將會發表調查報告，內容將涉及審計報告中有關慈善團體監管嘅問題。帳委會過去每次發表報告時都會喺同日召開記者會，但今次就例外。據聞，有此安排係因為等埋另一份同樣與慈善團體監管有關嘅報告，先一齊開記者會交代，依家連記者會都要「等埋隔籬」，呢個議會真係古古怪怪！
據了解，今次帳委會報告係由委員會副主席梁繼昌負責，主題係《監察慈善籌款活動》，而另一委員陳淑莊就會負責另一個同慈善團體有關嘅章節，即《政府對慈善機構的支援及監察》。由於陳淑莊負責嘅章節相對複雜，要到十月先可以完成調查，所以梁繼昌就趁立法會暑假前搶先發表。
至於點解要「等埋隔籬」先召開記者會，有委員透露《監察慈善籌款活動》嘅報告「完全冇特別」，字眼亦唔嚴厲，單獨召開記者會都冇太多嘢可以講，就索性等埋一齊，內容更豐富。佢又話帳委會主席石禮謙今日都會喺立法會咪兜位見記者，只係形式唔同啫！