中環出更：紀念寵物李慧芬為愛貓出身份證
香港品牌發展局（品牌局）新一屆「香港名牌選舉暨香港服務名牌選舉」及「香港新星品牌選舉暨香港新星服務品牌選舉」尋日正式展開兼接受報名，講起本地品牌創意無窮，品牌局理事李慧芬（Stella）就透露早前幫愛貓整咗張寵物身份證，有晒名同出生日期，相當盞鬼。
本身養咗兩隻貓嘅Stella話，之前其中一隻過咗身，咁啱佢又喺社交網絡上面見到有店舖整寵物身份證，就整咗一張紀念佢隻愛貓。而呢張貓咪身份證本身係八達通嚟，但佢有用開一張，所以就整成貼紙黐喺面，遲啲再幫另一隻貓都整一張喎。
徐詠琳憶述建立品牌艱辛
轉頭見到前得獎公司代表、飛鏢工房創辦人徐詠琳，講起創業兩年來嘅經歷好似摸住石頭過河，要見步行步。由最初大家對飛鏢印象停留喺酒吧先玩到嘅觀念，到依家逐漸被學校接納，好似桌球同保齡球咁，慢慢成為一種健康又正面嘅運動，要花好多心機。
佢早前除咗喺二十多間中學舉辦飛鏢比賽同教學，又教小學生點樣一手一腳砌個鏢靶出嚟，好多老師同學生反應都非常投入，嚟緊七月十四至十五日九展仲會有一連兩日嘅香港國際飛鏢節，第一日將免費開放予公眾參觀，希望更多年輕人早啲認識呢項運動，多啲年輕專業選手。
講番品牌局主席黃家和同理事孫榮良，兩個呢日以一白一黑嘅留鬚造型亮相，唔通想打造品牌局標誌look？黃家和就笑言每次去完法國酒莊返嚟冇剃鬚，朋友卻一致讚好，咪繼續留囉！孫榮良就笑言佢啲小朋友好黐爺爺，所以爺爺就出絕招，話：「有鬚嗰個先係Daddy」，結果佢就要一直留鬚嘞！
卓妮