中環出更：選港大新校長 葉建源爭做代表
香港大學校長馬斐森提早喺明年一月離任，港大已啟動有關物色新校長程序。身兼立法會教育界議員嘅港大校友關注組召集人葉建源，尋日宣布會爭取成為港大校長遴選委員會嘅校友代表，話要去監察選舉過程，確保符合程序公義。
稱為確保符合程序公義
葉建源得到包括立法會前議員梁家傑等二十名校友嘅提名，參選爭取成為港大校長遴選委員會嘅校友代表。港大內部近年風波不斷，繼委任法律學院前院長陳文敏升任副校長而鬧出軒然大波，其後行政會議成員李國章喺爭議聲中獲委任為港大校務委員會主席，葉建源指今次參選，係為咗監察同確保新校長嘅遴選符合程序公義，又話會傳達校友同教員對新校長嘅期望，例如要求新校長要有捍衞學術自由同院校自主決心。
暫時嚟講只有葉建源一人提名，但仍然等今日結束提名期後，先知有冇其他人同佢競爭校友代表一席。如有其他人參選，屆時全體校友可透過網上作投票，有關安排將由畢業生議會負責。校長遴選委員會有十一席，葉建源話教職員有三名代表，及一名學生代表均由選舉產生，唔擔心監察力度不足。
卓妮