中環出更：翁國豪安排制服 的士司機着唔慣
早前有內地召車應用程式對本港專營的士甚有興趣，卓妮尋日喺沙田馬場見到家族經營相關生意嘅翁國豪（Peter），佢話現時競爭愈來愈大，香港的士司機嘅態度同硬件均逐漸改進中，而相比其他地方，香港的士收費仍算相宜。佢又話唔同地方營運方式唔同，佢哋曾安排司機好似日本司機咁着制服，但香港司機就唔多慣，着咗一個月多啲就冇再着喇！
同Peter及香港中華廠商聯合會青年委員會副主席史昊洺講起喺外國搭的士嘅經驗，史昊洺認為香港的士有改善空間，好似支付系統咁，喺英國搭的士可以用信用卡畀錢，非常方便，而香港則暫時未有，連可以用八達通畀錢嘅都好少。不過，佢認為外國搭的士貴過香港，服務卻唔見得一定好好多，態度其實相若，反觀香港部分的士硬件都有提升，佢就搭過大部啲嘅的士。
徐炳光澳門搭的士被劏
轉頭見到廠商會副會長徐炳光，講起唔少人都試過繁忙時間截唔到的士、搭的士時被兜路等，佢就話試過喺澳門同朋友趕船時幾經辛苦截到架的士，點知對方獅子開大口話搭去碼頭要三百蚊，完全唔合理，仲發難話唔畀就去番佢哋上車個位，當時佢哋又趕時間，惟有焗講價，結果最後都要畀二百蚊。而喺香港，徐炳光就未遇過呢類司機，但知道打風落雨特別難截，所以出門見到天氣差就寧願自己揸車。
「鞋王」千金鄺紫凌就慶幸暫時都未遇過態度惡劣嘅司機，亦冇遇過被司機兜路，因為佢經常揸車好熟路，一上車就會指定要點行。而佢亦未試過畀司機話冇散紙找，因為如果佢覺得司機好通常都會主動畀貼士或齊頭。
卓妮