有人話，人生分為三個階段，三分之一讀書，三分之一工作，剩低三分之一安享退休生活，辛苦搵埋啱啱夠使。可惜隨着人類愈來愈長壽，好多人退休分分鐘講緊三十幾年，呢鋪講法一早out晒，特別喺香港，生活成本超高，退休幾乎毫無保障，享清福就冇嘞，捱世界就有份。
唔係講笑o架。有機構訪問約一千個打工仔，發現只有三成七人認為退休後可享舒適生活，較兩年前同一調查下跌廿四個百分點。最誇張嘅係，接近一半打工仔預期退休儲備無法維持慣常生活水平，會重返職場工作咁話。
正所謂有頭髮冇人想做瘌痢，好多香港人退休後仲要拋番個身出嚟做嘢，七老八十揸的士揸小巴，又或者冒畀食環署惡吏拘控風險執紙皮嘅長者大有人在，講到尾都係生活逼人。上述調查計過數，一對住公屋嘅退休夫婦要維持基本生活模式，每個月要使成九千幾蚊；至於住私人樓嘅，如要維持現有生活水平，每月開支預算更高達三萬至五萬銀，都咪話唔乸脷。港產官僚開口埋口退休保障「三大支柱」，個人儲蓄係其中一碌，家陣一半人退而無得休，等於大巴大巴摑埋去。
咁「三大支柱」另外兩碌又如何？綜援作為一個人走投無路嘅最後依靠，根本談唔上咩退休保障。強積金亦係唔使恨，打工仔辛辛苦苦供幾十年，結果大部分養肥咗班受託人，自己得番雞碎咁多，試問點夠搣過世吖！
真係愈講愈火滾。全民退保講咗N年，亦係港人共識，而民間方案亦冇話獅子開大口，人人有份每月都係講緊領三千零銀，點知港府一味撳實荷包，死係要強調有經濟需要至攞得，暗啞底其實想諗縮數搞資產審查。新官上任三把火，或者有啲人會對新政府從善如流存有幻想，但勞福局局長羅致光已經講到明，本屆政府認同上屆政府喺退休保障方面嘅理念，即集中社會有限資源，照顧有需要長者，睇嚟大家可以死咗條心。
所以話，今時今日做香港人慘，做香港老人更加係慘上加慘。好似政府津助安老宿位咁吖，上屆政府五年任期只係增加一千四百個咁大把，相對同期新增嘅十五萬名六十五歲以上長者人口，連杯水車薪都不如，淨係舊年就有超過六千位長者等唔切宿位含恨而終，所謂「老有所依」、「老有所養」，根本係得啖笑。
一句到尾，錢可以解決嘅問題唔係問題。港府坐擁金山銀山，肥到着唔到襪，點解對老人家斤斤計較？點解對長者臨老唔過得世無動於衷？話唔係慳埋慳埋留番畀公務員咬長糧，講出嚟都冇人信！