政情：公民講場：徐立之叫學生交流 培養國際視野

近年香港嘅大學放寬咗取錄非本地生上限，藉此提升大學國際化水平，不過非本地生中就以內地生為主，社會上有意見就質疑收非本地生對提升學生國際視野作用不大。曾任香港大學校長嘅港科院院長徐立之就認為，大學非本地生當中以內地生佔多呢個情況不足為奇，仲話院校仍然可以交流等活動培養學生國際視野，達致國際化嘅目的喎。猶記得徐立之擔任港大校長時，任內都錄取唔少內地生，仲話有助提升國際化添，結果就搞到被嘲係實行「內地化」至真。徐立之依家就話可藉交流培養國際視野，係自打嘴巴定終於發現收內地生無助提升國際視野呢？