政情：騸雞視網膜脫落兼有白內障
前立法會議員單仲偕（騸雞）退下火線之後，經常遊山玩水，點知悠閒嘅退休生活突然出現小風波。騸雞自爆四月去新西蘭旅行時突然發現視網膜脫落，左眼只係得一半視力，搞到佢要中止旅行立即回港治療；做完手術之後又發現有白內障，真係禍不單行。
騸雞話，四月時帶外母同老婆去新西蘭自駕遊，睇大峽谷、搭吓直升機，不知幾高興。但旅程去到一半時突然發現視網膜脫落，左眼下半部有黑影遮擋，於是佢就搵舊同事郭家麒醫生喺香港幫手安排入院，仲放低老婆一個人買機票返香港緊急治理。
八月要再做手術治療
騸雞透露，佢一落機就即時入院，翌日早上立即做手術，非常驚險，好在手術順利完成。不過，做完視網膜手術後又發現有白內障，八月就預備要再做手術治療。騸雞話，無做議員之後本來打算搵真銀，依家有病又再延後咗搵工大計，反而留喺屋企做住家男人喎。