政情：建制唔想張超雄攞彩 力阻兒童權利小組延期
立法會有機制成立小組集中討論各社會議題，但呢啲小組如果喺限期內未完成工作，就要向內務委員會申請延期，否則一到期就自動解散。內會尋日就討論將兒童權利小組嘅工作限期延長，但小組本身係由工黨議員張超雄擔任主席，為咗阻止佢繼續借小組攞彩，建制派就出招阻小組延期，但結果都係失敗告終。
最後都順利通過
尋日內會就是否延展兒童權利小組表決，電腦顯示差兩票先否決到個議案，民主派見到賽果順利，本來都鬆一口氣，但點知議員石禮謙突然話自己本身想投反對票，不過個按鈕冇反應，要求內會主席李慧琼記錄低。民主派一聽到就輪流發炮，鬧爆石禮謙冇投到票就賴個按鈕冇反應，仲話明知個按鈕唔得就應該早響。李慧琼就話，個票數差距影響唔到表決結果，唔處理呢個問題。不過會後秘書處發信畀議員，話石禮謙喺宣布表決結果前已提出未能使用投票系統，所以接納佢嘅要求。即使係咁小組最後都係順利延展。
張超雄經常參與弱勢社群事務，但班建制派就睇唔過眼，覺得佢藉此攞彩爭取弱勢社群支持，認為如果小組成功延期，佢就可以食住條水，於是先至出招，可惜最後都係得個吉。