政情：查鼎委員會 泛民玩殘自己 篩走郭榮鏗
民建聯（民記）立法會議員周浩鼎（Holden）涉與前特首梁振英「打龍通」事件唔止引起滿城風雨，Holden自己仲周身蟻。立法會早前通過咗就譴責周浩鼎嘅動議成立調查委員會，尋日就選出調查委員會七名成員。民主派原本打算由法律界立法會議員郭榮鏗（Dennis）同最資深嘅議員涂謹申（阿涂）加入調查委員會，點知建築界議員姚松炎「唔生性」又要搶位，最終令建制派成功篩走Dennis，漁人得利。
今次調查Holden嘅委員會，喺議會佔大多數嘅建制派為咗「護鼎」，早已明言七個委員中建制派要佔五個，剩下兩個位畀泛民，並由身兼建制班長嘅商界廖長江、工業界吳永嘉、經民聯石禮謙、工聯會陸頌雄同民記黃定光負責競逐。民主派本來接受安排，並提出由Dennis同阿涂加入調查委員會。民主派本來就想藉Dennis同阿涂熟悉法律，增強火力對付Holden，點知資訊科技界議員莫乃光（Charles）同姚松炎就無啦啦喺截止期限前加入，令候選人數突然增加至九人，殺民主派一個措手不及。
姚松炎：用行動證明非弱者
尋日終於要選出七人加入調查委員會，Charles又臨時舉手退出選舉，於是就由八名議員去爭調查委員會七個位，結果就由Dennis得票最低，被踢出局，姚松炎反而成功加入。有建制派議員就透露，佢哋本身非常擔心Dennis嘅法律背景，姚松炎加入戰團正正幫咗佢哋一把，令佢哋可以踢走Dennis。不過亦有另一建制派議員就聲稱只係巧合，冇夾過嘅，真係信不信由你喇。
Dennis事後話，相信姚松炎都有能力進行調查，亦都有民主派議員笑稱姚松炎都「好掯」，以為姚松炎比Dennis弱係錯誤判斷。至於姚松炎就解釋，自己加入戰團係因為想突破民主派嘅「宿命」，唔希望建制派分兩個位畀民主派，民主派就只派兩個人去選。佢認為自己應該作出嘗試，又聲稱事前有同民主派溝通，仲話自己亦有其他專業背景可以協助調查，如果有人認為佢弱，佢會用行動嚟證明自己唔係喎。
講到尾，姚松炎的而且確幫咗建制派一把篩走Dennis，究竟佢係咪「豬隊友」，就要睇佢喺調查委員會嘅表現喇。