中環出更：鬥快撳掣 陳振英搶唔到頭位發言
立法會會議一向有設時限，議員若要發言就要分秒必爭鬥快撳發言掣。話說日前喺新政府上場後嘅首場特首答問大會，班議員又再一次要鬥快撳掣。金融界立法會議員陳振英（Ronick）就話雖然自己平日訓練有素，但因為特首進場時要站立，變咗撳掣時唔就手，搞到最後無得搶頭位發言。
答問大會當日因多名非建制派議員拒絕喺特首進場時站立，相比之下佢哋坐喺度撳掣會就手啲，因此自決派嘅議員羅冠聰同埋朱凱廸分別成為第一個同第三個發言嘅議員。Ronick就話，佢下次會試吓調整顯示屏嘅位置，方便自己企起身都可以撳到掣喎。
用一年時間研究技巧
喺今屆立法會先做議員嘅Ronick又透露，平日會喺唔同嘅會議上透過不斷撳掣睇吓有乜嘢技巧搶頭位發言，用咗接近一年時間去摸索，好多時喺事務委員會上都可以成功搶到頭幾個發言。不過由於顯示屏係睇唔到自己第幾個發言，再加上主席會調整發言次序，所以仲要訓練吓先可以掌握到喎。
卓妮