中環出更：機械人統治地球？洪文正：唔係冇可能
AI（人工智能）發展愈趨成熟，由多次擊敗圍棋高手到兩個Chatbot（聊天機械人）互相對談兼發展出自己嘅語言，連外界都唔知佢哋講乜嘢。卓妮早前喺一個活動上見到互聯網專業協會會長洪為民（Witman）同副會長洪文正（Alex），傾開Chatbot嘅話題，Alex話將來機械人統治地球亦未必冇可能。
喺第十二屆泛珠三角「中星杯」計算機作品賽總決賽優秀作品展中，Alex話早前有個測試將兩個Chatbot放埋一齊自己傾偈，兩個機械人傾傾吓會發展出一種新語言，係人類唔明嘅，佢哋私底下傾緊乜嘢都冇人知，所以話啲電影橋段描述將來機械人統治地球真係未必冇可能。不過對於機械人取代人類工作呢方面，佢就認為雖然好多舊工種逐漸消失及被淘汰，但亦出現唔少新行業，因此唔擔心會好多人失業。
洪為民話輸畀AI唔使介懷
Witman就認為，捉棋係一個數學遊戲，要預計對方下一步棋嘅多個可能性，而電腦不受精神情緒影響，可不眠不休，因此計得較多較快同勝出都唔使太介懷。佢又話，有人認為如果同AI對談時分唔到個AI係咪人類就算發展成熟，但佢就覺得，到AI識得自己學新嘢兼有自我意識嘅時候，先至需要擔心。
對於現時科技咁方便，去日本都可以用即時翻譯筆，佢就話咁樣並唔影響人類學外語嘅動機，因為學語言要了解埋背後文化，就好似聽笑話咁，要知道背景先識笑。
今次作品展於科學園展出，創新及科技局局長楊偉雄都有到場參觀，仲試用部分學生作品。有香港大學學生就製作咗帶觸感反饋嘅傳感器手套，可以控制機械手進行細微手部動作，以應用於機械人進行災難拯救、清理放射性污染地方及消除炸彈等危險任務。
卓妮