政情：岑智明「追風」畀市民捕獲
尋日大致天晴，只係有幾陣驟雨，但天文台台長岑智明竟然都出動？係呀！佢去咗追尋颱風，仲被市民野生捕獲添！追風可能講得有啲誇張，但確實同颱風有關。有市民尋日喺中環嘅郵政總局野生捕獲岑智明，當時佢正小心地處理數字颱風信號百周年紀念郵票，發現有市民拍照，佢唔抗拒反而顯得好開心。
愛收集風災照片
其實岑智明所買嘅紀念郵票同天文台有直接關連，相信大家仲記得以前打風掛嘅「風球」，俗稱「風球」嘅實物颱風信號原本為方便航海人士，其後喺社會廣泛應用，香港喺一九一七年開始使用數字颱風信號嚟表示熱帶氣旋吹襲時嘅風向同風力，而二○一七年適逢數字颱風信號百周年，天文台同香港郵政合作喺六月中旬推出以數字颱風信號作主題嘅郵票，希望能增進市民對颱風信號嘅了解，兼且提高防災意識。
眾所周知，岑智明喜歡搜集風災照片，過往亦曾向傳媒展示其私人珍藏，仲話收集咁多舊風災照片，用作日後寫書之用，因此佢當然對同風災有關嘅郵票感興趣，將之作為收藏品，無論在公在私都係一件樂事。