政情：識聽廣東話 鍾意食魚蛋 李雲迪視香港如家
有「鋼琴王子」之稱嘅國際著名鋼琴家李雲迪成為香港人已有一段時間，除定時定候喺各大場合一展所長，以一雙手吸引所有人嘅注意力同目光外，尋晚更喺煙花匯演晚宴上即席獻技，演奏兩首樂曲。佢話香港畀佢家嘅感覺，現時佢完全聽得明廣東話，又好喜歡香港小食，每次返港都不忘買魚蛋食，又話香港好方便，包羅萬有，係一個充滿活力嘅城市。
暫未喺港單獨收生
身為一個鋼琴家，李雲迪經常要喺唔同嘅地方演出，留港時間都要按演出行程而定，提到佢喺香港逗留最多嘅地方，始終係佢多次演出嘅地點，即尖沙咀文化中心等演奏場地，帶畀佢唔少靈感。佢又話喺香港表演次數之多已經數不盡，今次佢演出蕭邦其中一首夜曲同埋另外一首廣東民曲《彩雲追月》，認為能夠代表中西方文化融合，同跟香港一樣，多元化又具國際性。
佢又認為香港學生音樂氛圍濃厚，雖然佢暫未喺香港單獨收學生，但希望能夠喺香港開展更多音樂文化教育工作，助年輕人發揮才能，追求同實現夢想。佢又話香港音樂場所多，接觸資訊好快好新，係輸出文化嘅好窗口，有助提升小朋友嘅音樂素養。