中環出更：游蕙禎現身遊行 見記者即避
被取消立法會議員資格嘅青年新政游蕙禎銷聲匿迹一排，尋日就現身七一遊行，不過佢一見到記者就即刻掉頭走。其後佢又再被發現一個人跟住遊行隊伍，佢就話自己參加遊行，只係為咗觀摩街站籌款運作喎，之後未到遊行終點政府總部就已經離隊走人喇。游蕙禎早前透露過要靠積蓄度日，唔通今次係嚟偷師，為日後幫自己籌款鋪路？
話想觀摩街站籌款運作
游蕙禎尋日下午約三時現身銅鑼灣鵝頸橋，着白色短袖衫襯牛仔短褲嘅佢企喺路邊望住遊行隊伍，畀記者發現時，佢立刻轉身離開。其後佢又走入遊行隊伍，不過行到去金鐘海富中心時，佢又突然急步離隊，走去附近的士站排隊等搭的士。有記者就上前問佢點解咁早走啦，佢就話只係想低調參與，知道遊行終點站會有好多記者，因為唔想上鏡，所以走先。
自從因宣誓辱華而被取消議員資格後，除咗出席相關官司聆訊外，游蕙禎已絕少出席公開場合，最多都係喺社交網站發表言論。點解今次一個人嚟參與遊行呢？佢就話係想嚟觀摩啲街站籌款係點運作。青年新政今年並冇擺街站，而佢早前就自爆搵唔到正職，連散工都無得撈，要靠積蓄度日。今次佢嚟偷師，睇怕都似係為咗日後為自己籌款鋪路喇。
卓妮