中環出更：孫燕華搞美術館 盼變遊客景點
香港旅遊景點少，除咗購物，想吸引遊客重遊香江都唔易。孫少文基金會創辦嘅一新美術館早前舉行水彩畫展覽開幕禮，並慶祝美術館成立兩周年，基金會主席孫燕華（Chloe）話兩年來美術館共展出五十位本地藝術家作品，入場人數逾萬人次，雖然數字唔係好驚人，但係對於只有五個人嘅團隊嚟講，確係唔容易。佢仲話希望終有一日遊客來港除咗購物之外，仲會諗到去行吓博物館喎。
當日Chloe着住一件靚旗袍，明顯清減咗好多，原來佢最近勤做運動，瘦咗七、八磅，難怪講起就開心。不過講到開心，都唔夠見到美術館做出成績咁開心。佢話一個城市嘅文化力量可以用美術館嘅數字衡量，所以佢希望推動香港嘅民間博物館文化，有朝一日行博物館可列入遊客嘅行程咁話。
黃仲民成日去外國寫生
今次《萬紫千紅：香港新水彩》共展出包括國際當代畫家協會會長黃仲民同副會長陳祖恩等十四位藝術家作品，當中最年輕嘅係仲讀緊大學嘅香港青年新興藝術家謝樂柔。黃仲民話自己鍾意畫大自然，經常去外國寫生，今次就展出唔少瑞士嘅景色。點解唔畫香港風景？佢就話香港啲景唔靚，連新界都起晒樓，邊有靚景？
Chloe嘅爸爸孫少文同媽媽孫蔡吐媚都有到場，孫太啱啱同朋友去咗中國佛教四大名山之一嘅普陀山，朝朝三點半就起身準備上早課，夜晚八、九點瞓覺，洗滌心靈幾日，難怪精神咁好喇！
卓妮