政情：嚴天生鬧莫嘉嫻講大話
民協前主席莫嘉嫻因不滿馮檢基決意「永續參選」而正式退黨，以為事情暫告一段落之際，又流出民協創黨黨員、屯門前區議員嚴天生喺周三（28日）向黨員發出嘅公開信，炮轟莫嘉嫻稱有六名區議員退黨因與佢想法相近嘅說法係講大話，又質疑莫喺舊年立法會九龍西選舉中搞到民協分裂，促請佢唔好令民協受傷更深。
公開信以「給莫嘉嫻的一封公開信」為題，署名為嚴天生。文首即強調要「澄清事實」，指莫嘉嫻接受傳媒訪問時，提及有六位區議員同佢嘅想法相近而相繼退黨嘅說法與事實不符。佢喺信中指六名退黨區議員係各有唔同理由，指其中兩位係因為莫嘉嫻喺舊年二月，突然要求重選以取代早已敲定出選嘅譚國僑，對莫嘅做法不滿所以喺嗰段期間退黨；另有一名係喺一五年區議會選舉後已有退黨意圖，認為莫嘅說法有偏差。
指搞到民協分裂
嚴又爆料指民協喺○八年已委任莫嘉嫻擔任副主席，但莫卻以家庭為重辭去職位，又指莫甚少參與黨內同全港性事務，態度欠積極。民協喺舊年立法會選舉失去老巢九龍西，嚴炮轟係因為莫突然要求重選九龍西代表所致，令民協內部分裂。信末嚴更話尊重莫退黨嘅意願，但促請佢勿再借馮檢基將參加九龍西補選泛民初選一事為自己戴上光環，令民協受傷更深。
嚴天生接受查詢時承認公開信係佢親手撰寫，又話本來只想向民協職員同會員交代，強調信件與補選無關。對於信件中嘅內容，本報曾多次聯絡莫嘉嫻，但佢以開會為由未有回覆。