政情：學戴耀廷反口 邵家臻 胡志偉 張超雄 （抓）官司費
違法佔領行動發生至今逾兩年，只有九名搞手被檢控，當中「佔中三子」戴耀廷、陳健民同朱耀明喺前日正式反口拒絕認罪，仲要求已「乾塘」嘅「守護公義基金」籌款，以助佢哋喺法庭上抗辯後，同被檢控嘅立法會社會及福利界議員邵家臻尋日亦反口拒絕認罪，仲聯同有份參與佔中嘅民主黨（白鴿黨）議員胡志偉同工黨議員張超雄，公開呼籲市民捐錢畀基金。呢班人當年口口聲聲「公民抗命，無畏無懼」兼會承擔法律責任，依家就走數，仲周街「籌旗」要市民為佢哋嘅官司費埋單找數，真係令人髮指。
胡志偉聯同張超雄及邵家臻尋日出嚟見記者，胡志偉話白鴿黨、工黨同社工團體將喺民間人權陣線今日舉行嘅七一遊行擺設街站籌款，籌得嘅款項將捐畀「守護公義基金」，以協助參與佔領運動嘅人士面對法律訴訟。
胡志偉又話，雖然參與佔領嘅人預咗面對法律責任，但依家面對嘅控罪係「超乎想像嘅控罪」，並非一般公眾集會、遊行時可能面對嘅檢控，為咗令政府唔可以以法律去遏制抗爭者表達意見，故此要為抗爭者提供支援，以助佢哋面對唔合理嘅訴訟喎。
睇怕走數事件陸續有嚟
點解咁少政黨同團體參與？胡志偉就話因為時間倉促，所以未能聯絡其他政團參與，又話有啲團體可能直接面對法律訴訟，所以佢哋未面對訴訟嘅可以先幫助佢哋。白鴿黨參與佔領嘅點止咁少，白鴿黨都係泥菩薩過江，依家仲話幫人，真係笑大人個口。
對於被質疑出爾反爾唔認罪，邵家臻話警方早前係以參與未經許可集會相關罪名對其作出檢控，與公眾妨擾無關。對於警方依家以公眾妨擾相關罪行檢控佢自己在內嘅九人，佢明言自己唔會承擔「失實」及「別有用心」嘅控罪。佢又聲稱，如果對佢嘅控罪改為非法集結罪，佢就已經認咗罪，唔使搞咁多嘢喎。
其實依家包括壹傳媒黎智英（漢奸黎）在內三十九名佔中搞手仲係逍遙法外，胡志偉參與佔中後去警署自首，而張超雄就接受咗預約拘捕，雖則仍未被檢控，但已急急跟住佔中三子走數，睇怕反口嘅搞手或其他佔中者陸續有嚟。
再講，佢哋嘅講法根本就係搬龍門、搵藉口，如果人人犯法都可以揀控罪嚟認，豈不天下大亂？佢哋依家仲好意思呼籲市民七一上街捐錢畀佢哋打官司，變相叫市民為佢哋嘅違法行為埋單找數，市民對幫唔幫佢哋埋呢張單應該心中有數喇！