中環出更：喜獲「泰妹」 鄭松泰唔會錫身
鄭松泰自從上年十月擔任立法會議員開始就黑氣纏身，先係喺立法會會議廳內涉倒插五星旗同區旗，搞到被控侮辱國旗及侮辱區旗兩條罪，早前仲爆出黨內錄音，爆粗叫青年新政游蕙禎同梁頌恆去死，又批評市民係白癡。經歷過咁多負面新聞後，佢尋日終於有好新消息宣布，就係「泰妹」降臨嘞，佢仲話唔會因而錫身添！
話剪臍帶好似剪綵咁
泰妹係邊個？咪係鄭松泰囡囡囉！囡囡尋日朝早出世，母女平安。初為人父嘅鄭松泰，尋日八點幾喺Facebook宣布喜訊，話「泰妹降臨」、「女仔最緊要多頭髮」等等。佢透露，太太係剖腹產女，而自己就有陪產同埋剪臍帶。他仲講笑話剪臍帶就好似剪綵咁，護士會預先準備好畀他剪。佢仲透露，話泰妹成七磅幾重，但暫時未改名，等睇吓泰妹嘅性格先再決定。
由人夫變成人父，唔知鄭松泰會唔會從此「錫身」、少惹官非呢？佢就話唔關事，仲話自己公私分明，「要做嘢就去做」。不過，仔女多數都會以父母做榜樣，唔知泰妹將來又會唔會好似佢老竇咁從政呢？
卓妮