中環出更：自認踢波唔叻 霍啟山寄望培育姪仔
唔少大人都會將自己做唔到嘅事，寄望下一代做得到。本身係足總董事嘅香港青年聯會（青聯）副主席霍啟山早前出席青聯同保良局合辦嘅足球比賽，見到佢踢波完全唔錫身。佢坦言好鍾意踢波，但踢得唔係咁叻，仲笑指哥哥霍啟剛個仔可能踢得叻過自己，寄望將來培育姪仔成為高手！
啟山話自己喺○七年返港後先開始踢波，今年就係十周年嘞！身邊有好幾個嚟自唔同團體嘅朋友都好鍾意踢波，佢就負責每兩星期幫大家book場，久而久之，一班朋友就話不如搞個比賽啦，就造就咗呢場球賽加嘉年華，咁多啲小朋友可以參加。
楊德強踢到心愛波boot爛埋
講起小朋友，啟山話哥哥啟剛都有帶個仔去踢波玩吓，雖然自己未同姪仔踢過，但感覺姪仔都有啲興趣，喺呢個時候就更加唔敢培訓姪仔，一來得三歲幾，實在太細個，二來怕一逼，反而令到小朋友唔想踢，由於自己太大個先學踢波，所以唔係踢得咁叻，希望姪仔大個少少真係有興趣踢時就培訓佢踢得叻啲，笑指自己真係多角度推廣足球發展o架！
體育專員楊德強明顯球技精湛，仲相當落力，連心愛嘅波boot都踢爛埋。佢話呢對鞋係七、八年前買嘅，當時好鍾意，買咗兩對，另一對早就爛咗，依家呢對都爛埋，估計都買唔番，又話依家新出嘅波boot太輕，自己唔係咁習慣。真係聽到都戥佢心痛呀！
至於青聯主席吳傑莊就話最少廿年冇踢波，嗰日落場踢咗三分鐘，仲成功傳咗兩次波，大呼好彩。至於保良局主席陳細潔就冇份落場踢嘞，講開足球，佢話鍾意美斯，大讚佢好有魅力，踢波又叻，如果踢得叻，但係唔靚仔，自己可能就冇乜留意嘞！
佢話成日約一大班朋友喺屋企睇球賽嘅決賽，好似開party咁，啲朋友仲會睇到「你鬧我、我鬧你」咁為自己嘅愛隊打氣，但唔會傷感情，都係玩吓啫！
卓妮