中環出更：單澤森嘆港土壤難種靚生果
台灣駐港經貿機構尋日舉行台灣夏季水果推廣活動，卓妮遇到家族做生果入口生意的果欄第三代後人單澤森（Sam），佢話經常去台灣考察，對台灣唔以規模取勝嘅小農經濟印象深刻，讚佢哋啲技術含量高，農民態度好專注。照咁講，香港地方唔大，科技又跟得上，咪可以偷吓師囉？阿Sam就話可惜香港土壤唔夠肥沃，種唔出靚生果喎。
阿Sam家族做水果入口三十幾年，主要供應世界各地靚生果畀超市同批發，佢去過好多地方考察，對台灣果農評價好高。例如今次都有來港推廣嘅「黑葉荔枝」，由採摘到運送就喺攝氏五度進行，保鮮技術一流。講講吓，佢突然話尋日喺現場見到台灣香蕉好開心，事關當地香蕉係全天然種植，口感好，但好賣到好少賣到香港，所以要趁機買梳蕉返去。
倪伯嘉巫英臣鍾意食杧果
其實阿Sam都研究過係咪可以喺香港種生果，但發現香港土壤唔係咁肥沃，只能種啲水耕菜、有機菇類等。由於環保同健康嘅理由，現時全球興起一股食用本地食材嘅風潮，佢話若果有香港製造嘅蔬果，都會覺得好驕傲。
香江文化交流基金會主席江素惠同港澳台灣同鄉會會長林華琴都有到場，仲大讚水果既新鮮又香甜。場內有十幾種當造台灣水果招呼賓客，當中以杧果最受歡迎，遠東貿易中心主任倪伯嘉同台北貿易中心主任巫英臣都好鍾意食。
巫英臣話舊年銷港嘅台灣水果達六千公頓，但因杧果失收，舊年杧果銷港少咗七成，而今年雨水充足，杧果盛產豐收，產量回復往年高峰，大家可以盡情食。不過怕水嘅荔枝就失收喇，但係為咗今次活動，都搶收咗啲帶嚟香港。
卓妮