咪以為回歸二十周年兼港府換屆在即，港產官僚會一改尸位素餐嘅陋習，喺呢幾日站好最後一班崗喎，事實係馬虎甩漏，Hea做照舊嘅咋，唔信嘅，聽吓申訴專員公署點講吖。
正所謂爛泥扶唔上壁，長據政府部門投訴榜首嘅房屋署又有混帳嘢嘞，今次仲要同埋水務署一齊衰添。係咁嘅，現時公屋公共地方及空置單位嘅水費由房屋署支付，具體則交由外判嘅屋邨辦事處負責。申訴專員公署收到投訴，話有公屋租戶啱啱搬入新單位，管理公司就即刻奉上大大張水費帳單，將單位空置期間嘅水費入埋新租戶嘅數，即係明屈啫，有冇再離譜啲吖。
咁都未算，申訴專員公署仲發現水務署一直冇正視房屋署欠交水費嘅問題，截至去年一月底，已經有多達九十五條屋邨近四百個住宅及非住宅單位欠交水費，涉款超過十萬元，最長欠繳個案仲超過十年添，問你服未。
即係咁，莫講話十年唔交水費，普通市民唔交幾個月水費咋，隨時畀水務署cut水都似，偏偏房屋署好似有特權咁款，有啲公屋辦事處一直唔交水費，水務署係就係發出催繳通知書，但都係得個樣嘅咋，外判管理公司係都唔交咯喎，一樣吹佢唔脹。仲有喎，兩署對於空置公屋單位應否斷水有不同說法，對於涉及租戶嘅供水用戶權轉名安排更加係立立亂，結果令部分水費欠款要一筆勾銷，你話係咪倒米吖。
睇到喇，交水費咁小事之嘛，房屋署同水務署都搞到一塌糊塗，前者任由外判管理公司胡作非為，向租戶亂收水費又得，長期唔交水費又得，擺明將監管責任一併外判喇；後者就當公帑唔係公帑，水費收唔到就由佢，呢啲唔係管理混亂、敷衍塞責又係乜呀？再講吖，食水係珍貴資源，空置單位就好應該cut水喇，香港好彩冇乜制水情況啫，但都唔代表可以亂咁浪費食水囉。
話時話，港府嘅外判制度一直備受詬病，好似今次咁，申訴專員批評房屋署一直未有就外判事宜設立中央紀錄，又冇嚴格執行監察指引，無王管咯喎，梗係亂象叢生喇。咁當然，港產官僚胡混度日嘅DNA深入骨髓，根本冇一個部門係乾淨嘅，房屋署固然衰到貼地，而食環署及地政總署亦不遑多讓，長期佔據投訴榜頭幾位，至於水務署嘅排名亦「節節上升」，簡直一擔擔。
都係前美國總統列根有智慧，一早睇穿「政府唔係解決問題嘅方法，政府本身就係問題」。所以話啫，港產官僚劣根性一日不改，就算新特首幾打得都好，都係英雄無用武之地嘅咋！