立法會尋日三讀通過增加小巴座位上限嘅法案，由十六個增至十九個，不過咪以為係無風無浪，立法會議員尹兆堅被外界批評「玩出火」，曾提出小巴座位增至二十個嘅修正案，最終自行撤回，尹兆堅發言時繼續咬住政府唔放，形容政府係「恐怖分子」，又以草案為人質強迫佢撤回修正案，批評政府此舉玉石俱焚，破壞行政立法關係，政府代表再三重申今次取得嘅突破得來不易，暗指尹兆堅修訂過咗龍。睇嚟尹兆堅咁好火，純粹係跌落地揦揸沙，有將玩過火嘅責任卸落政府之嫌！
