現屆政府任期進入倒數階段，合共有九名問責局長唔會過渡至新政府擔任任何崗位，其中前年七月才出任公務員事務局局長的張雲正，雖仍有公務員身份，但據悉張雲正決定全身而退，七一起展開退休前休假，並會陪同母親去旅行。
曾任海關關長嘅張雲正原本盛傳有望出任新班子嘅政務司司長，後來以照顧年老母親為由婉拒，最終連問責局長都唔做，決意離開官場「熱廚房」。
食物及衞生局局長高永文亦離開官場在即，佢尋日最後一次以局長身份出席立法會周三大會，自言唔捨得立法會，又話對於完成最後一次回應口頭質詢感到鬆一口氣。高永文亦有購買「散水餅」，以答謝一眾議員過去支持佢嘅工作。