政情：黃鎮廷返母校 課室以其命名
出色嘅運動員，年少時有合適嘅環境發展所長真係好重要。香港乒乓球一哥黃鎮廷尋日就返到位於沙田嘅母校林大輝中學，同師弟妹切磋球技，一齊玩「超級無敵乒乓波」，黃鎮廷笑指當時仲大壓力過打世界賽。身為林大輝中學創辦人兼校監林大輝透露，自己睇住黃鎮廷長大，而校董會一致通過黃鎮廷以往讀書嘅課室，以黃嘅名字命名，形容呢個係一份心意，希望為其他學生帶來正能量同榜樣。
回想起讀書點滴
黃鎮廷尋日返回母校時想起讀書嘅點滴，佢透露，自己係插班喺林大輝中學讀中二，最難忘母校嘅操場同鐘聲，而以往除咗打乒乓波，午飯時間仲會同同學打籃球添。
黃鎮廷其後返到以佢命名嘅班房，講起自己以前都做過行長，負責收下功課。佢話當日選擇轉嚟呢間學校讀書，係因為呢間學校好注重體育，當時想打好乒乓波，亦都犧牲咗其他事情，依家嘅願望仍然係希望有一日可以攞到世界冠軍。