政情：陳茂波帶着負分任司長
新一屆政府三司十三局主要官員，將於後日宣誓正式就任，新班子有唔少舊面孔，真正「新人」只得候任勞工及福利局局長羅致光。眾人未上任已有針對佢哋嘅民調出爐，其中今年初升任財政司司長嘅陳茂波（波叔）會過渡至新班子，只有兩成八受訪者認為波叔合適做財爺，低於認為唔合適嘅五成八，其合適程度淨值為負三十個百分點；相反數日後才上任嘅羅致光，其合適程度淨值有正六十個百分點。波叔同羅致光都係新班子一員，市民對佢哋觀感大不同，真係時也命也嘞！
民意調查 淨值負30百分點
中央於上周三（廿一日）任命新一屆政府主要官員，港大民意研究計劃喺本月廿三至廿六日以電話訪問五百多名香港市民，調查市民對候任官員嘅合適程度。三名司長方面，有多於五成受訪者均認為政務司司長張建宗及律政司司長袁國強合適出任司長，但亦有三成多認為兩人不合適，最終兩人嘅合適程度淨值都係正數。
三司唯一錄得負數淨值嘅波叔，只有不足三成人認為佢合適出任司長，更有近六成受訪者指佢唔合適，結果淨值就錄得負數，為負三十個百分點，連帶將三司嘅合適淨值拖低。
新官上任 羅致光合適度帶頭
雖然三司合適程度淨值受波叔拖累，但候任局長方面成績就唔算差，好似候任勞工及福利局局長羅致光，受訪者有七成四認為合適出任局長，唔合適只有一成三，其合適程度淨值有正六十個百分點，為眾司局長中成績最好嘅一位候任官員。
緊隨羅致光之後係由副局長「升呢」嘅候任食物及衞生局局長陳肇始，合適程度淨值為正五十一個百分點，排名第三就係候任公務員事務局局長羅智光，其合適程度淨值為正四十六個百分點。
不過有人歡喜有人愁，好似原職過渡嘅民政事務局局長劉江華，有五成三受訪者認為佢唔合適做局長，連帶其合適程度淨值為負數。
除此以外，一眾候任局長亦要面對另一問題，就係低認知率，合共有兩名候任局長嘅認知率低於五成，分別係候任政制及內地事務局局長聶德權嘅認知率只得四成九，候任財經事務及庫務局局長劉怡翔則只得四成八。其實劉怡翔於現屆政府係副局長，本身已經係政治委任官員，唔似得聶德權脫離公務員隊伍加入「熱廚房」，因此劉怡翔低於五成嘅認知率，相信都令唔少人大跌眼鏡！