派遞罷工無差用 窩囊港府冇鬼用

今屆政府收皮在即,講好嘅標準工時至今未見影,好多打工仔飽受無償加班之苦。不過同樣係打工仔,郵差叔叔就幸福得多嘞,加班多啲嚟密啲手,分分鐘和味過出雙糧,超時冇補水又可以發爛渣,真係恨死隔籬。

話說筲箕灣派遞局郵差由於不滿超時無補水,日前發起工業行動,拒絕超時派件,結果導致港島東多個屋苑及商廈派遞服務一度癱瘓,香港郵政要急調救兵補鑊,有商舖因為咁遲咗找數畀客戶,搞到鬼咁狼狽。

據工會講,成件事嘅導火線係傳聞郵政計劃改制,今後每名郵差承擔一定派遞指標,做得晒你本事,做唔晒加班都要死掂佢。郵政咁做法,其實都係想堵塞呃鐘補水嘅漏洞,睇番數字就知,香港郵政派遞郵件數量連年下跌,但加班補水開支卻不減反增,以一一至一二年度為例,有關開支達一億六千萬元,翌年居然大增至近二億元,話當中冇蠱惑就假嘅。

話時話,郵差涉嫌呃鐘補水早就係公開嘅秘密,手法五花八門,無奇不有,誇大處理郵件數量有之,返工時間告病假,放工生龍活虎加班搵真銀有之,傳媒固然早有揭露,審計署同申訴專員公署亦炳過好多鑊。審計報告就曾炮轟有郵政員工一年加班一千四百小時,相當於每日四小時,肥過肥仔水,話審批制度唔係形同虛設,講都冇人信。本報亦曾多次踢爆有郵差加班期間踢毽甚至隊酒取樂,醜態百出,有圖有證,但奇就奇在,郵政明明盛產懶蛇,卻從未聽聞當局派人捉懶蛇,姑息養奸咯喎,到頭來又係做死嗰班循規蹈矩嘅員工,試問公平何在。照咁睇嚟,署方今次揸正嚟做,平衡番個工作量,實在無可厚非。

不過嘥氣喇,郵差呢頭發動工業行動,據講署方嗰頭就澄清無意更改加班補水制度。咁即係點?即係署方羊質虎皮,一遇少少壓力就即刻跪低囉;即係納稅人嘅血汗錢繼續畀人任撳唔嬲囉。正所謂人善被人欺,對住呢挺窩囊僱主,伙記唔發佢圍簡直對唔住自己!

所以話,蒼蠅不叮無縫的蛋,郵務人員發起工業行動,就係睇死管方買佢哋怕。就好似康文署轄下救生員咁,三日唔埋兩日以集體請病假方式搞野貓式罷工,話口未完,維園其中一個泳池尋日又因為救生員「告急假」而要閉館。救生員有恃無恐,講到尾咪因為康文署弱雞過藥材舖囉。

有人就講得啱嘞,郵差又好救生員都好,話晒都叫做政府工鐵飯碗,試吓炒晒班搞事嘅,應徵者肯定由旺角排到沙頭角,管方使乜揸頸就命吖!