即將過渡新政府嘅政務司司長張建宗尋日興奮地發表網誌，話投身公務係佢唯一嘅志願，更細數佢過去四十五年喺政府服務嘅生涯，加上佢留任可以服務社會多五年，真係另類嘅五十年不變呀！其實佢畫公仔畫到出晒腸，早喺今年二月就講過自己好喜歡工作，「有得落場就興奮，唔坐冷板櫈就開心」，而喺候任特首林鄭月娥組班期間曾傳出有其他人選，但因為個個都唔肯加入「熱廚房」，最終「畀佢恨到留任」，但林鄭日前都講過唔排除有問責官員中途換人，張建宗係咪可以做足五年都講唔埋喎。
