政情：行會最年輕「叔叔」 張國鈞被指難代表青年
特區政府新班子同行政會議嘅名單上周已出爐，將成為三料議員嘅立法會議員張國鈞尋日出席一個論壇討論新政府人事任命時，有台下嘅男觀眾挑機批評新嘅行會成員大多都係地產界同埋具建制背景嘅人士，即使部分人選曾擁有泛民背景都未能代表泛民聲音，而張國鈞已四十幾歲，竟然算係行會最年輕嘅成員，代表唔到年輕人嘅聲音，更嘲諷佢係「張叔叔」，情況好尷尬。
接小西灣議辦 否認搶地盤
張國鈞其後出席佢嘅地區辦事處開幕禮時回應被嘲為「叔叔」事件，佢話最重要係行會成員能了解青年嘅困難、明白其心態，並唔係搵一個大學生入行會就代表到青年聲音，世界亦冇一個地方會咁做，而佢每一次參與論壇都會畀嗰個男子批評，故未有因為被戲稱張叔叔而感到「唔開心」。
對於有評論指佢同該黨另一議員黃定光喺小西灣設地區辦事處，係同工聯會「搶地盤」，張國鈞同工聯會一直有交流、合作，喺地區工作上亦有分工，而有關辦事處係該黨前議員鍾樹根留低嘅，強調係「王國興未做區議員已經喺度」、「大家冇乜矛盾」，而喺日後嘅區議會選舉亦會有共識，唔會出現互相競爭嘅情況。