政情：50億教育撥款 政府歎慢板 泛民淆底跪低
唔同政黨都會就政策同政府討論，通常政黨方面都會採取「開天索價」嘅策略，等待政府「落地還錢」，之後再取中間落墨嘅方案。不過民主派近年愈來愈「獅子開大口」，令政府不惜以一拍兩散、玉石俱焚嘅策略反擊，好似即將提交立法會審議嘅五十億元教育撥款，據了解政府近兩個星期採取「歎慢板」嘅策略，令教育界議員葉建源大為緊張，擔心有關撥款唔能夠如期批出而「淆底」，今日開記者會表明收貨，更促下屆政府盡快將撥款申請交上立法會。
拗小巴座位數目 尹兆堅捱轟
政府同民主派之間嘅角力不嬲都存在，好似建議將小巴座位由現時十六個增至十九個嘅《道路交通條例草案》，明明接近立法階段，政府突然發表聲明，點名批評民主黨（白鴿黨）尹兆堅提出將座位上限增加至二十個嘅修正案，破壞「得來不易的生態平衡」，表明要撤回草案。眼見政府搞到玉石俱焚，尹兆堅亦擔心變成千古罪人，令早有共識嘅草案不能通過，就急急「淆底跪低」，撤回自己所提嘅修正案，都算係政府嘅威脅策略成功咗。
據了解，政府又以同樣嘅方式處理同葉建源就五十億元教育撥款之間嘅角力。自候任特首林鄭月娥表明推出五十億元額外教育資源撥款後，葉建源同教協就不斷就有關用途提出意見，例如每班增加常額教師、設立常額特殊教育需要統籌主任（SENCO）同資助自資院校學生學費等。就此，葉建源同教協代表更加多次同候任特首辦公室主任陳國基會面，但近兩星期新班子就任在即，雙方嘅會面因而減少。
得一周審撥款 葉建源怕孭鑊
有人就估計，本身好希望撥款可以順利通過嘅葉建源就因此而囉囉攣，仲急急喺今日開記者會，公布「成功爭取」新政府聽佢唔同意見，仲表明會收貨，希望政府唔會好似「反擊」尹兆堅咁反擊佢，令有關撥款未能如期通過，自己就成為千古罪人。據悉，教育事務委員會已預計下月十日審議有關撥款申請，下月十四日就會提交財委會審議，到時財委會只有一星期處理撥款，只要稍一不慎就會泡湯，難怪葉建源咁緊張喇！