中環出更：警員被叫「黑警」 黎棟國好心痛
今個星期六就係政府換屆嘅日子，即將離開「熱廚房」嘅保安局局長黎棟國尋日喺電台節目分享過去十年嘅工作點滴。臨別依依，黎棟國感到最痛心嘅，係一班喺佔領行動同旺角暴亂中盡忠職守嘅警務人員被人叫「黑警」，重申警方無因為政治訴求而選擇性執法。
稱廿三條立法屬憲制責任
擾攘咗七十九日嘅佔領行動破壞香港秩序，黎棟國重申唔贊成市民用違法行為表達訴求，佢話對於警員被叫「黑警」相當痛心，因為一眾警員盡忠職守，即使喺佔領行動入面受傷最重嘅都係警員。對於外界懷疑有海外或內地執法人員在港執法，佢話《基本法》規定咗只有香港嘅執法機關先可以執法，無其他海外機關可以喺香港拉人，仲話凡事要講證據，否則只為傳聞。
至於涉及國家安全嘅《基本法》第二十三條仍未立法，佢話廿三條立法係特區嘅憲制責任，而且法律需要有完整性及整體性，唔能夠接納一條但唔接納另一條，希望社會以客觀態度看待。佢又透露一地兩檢嘅兩地通報機制，中港兩地政府已經達成咗共識，雙方正就具體內容磋商。
卓妮