中環出更：細個冇啖好食 趙式浩大個識自煮
香港人生活咁忙碌，經常都喺街外食飯，不過山珍海味有時都唔及屋企一餐家常便飯咁好食。卓妮早前喺一個活動上見到名人趙世曾嘅兒子趙式浩（Howard），佢話前一日先至喺屋企自己蒸肉餅食喎。
呢日Howard出席一個廚房品牌嘅開幕酒會，提到自己間唔中都會喺家中下廚，最多仲試過煮十二個人分量嘅食物。佢透露細個時父親忙於工作，家中多由工人姐姐負責煮飯，不過託工人買餸，打斧頭幾乎係日日發生嘅事，次次買餸都得好少嘢食，嗰時嘗試過同爸爸反映都冇乜用，所以大大吓就索性自己買嘢煮，而佢擅長嘅始終都係中餐咁話。
江碧蕙整餐蛋麵 老公已盛讚
依家炒餸基本上都難佢唔到，但有種食材佢就覺得好難煮，就係羊肉，事關羊肉熟得滯就會好「鞋」，生得滯又會好羶，佢整過兩次都失敗，之後又向朋友請教過，最後都係捨難取易煮其他嘢算。
咁香港首位華人女騎師江碧蕙同混血網球教練老公Jerome喺屋企又係食乜嘢菜式？江碧蕙就笑言老公鍾意食中餐仲多過西餐，最搞笑係中午簡單食一個餐蛋麵，夜晚打邊爐佢老公已經覺得好正喎。不過唔好見佢哋食呢啲嘢就以為佢唔識煮餸呀，佢細細個就開始煮飯，好多複雜菜式佢都識整，好似炆牛尾等，佢仲時不時會拍片上網教煮嘢食添！
相信唔少人都試過趁節日或者紀念日玩煮飯仔，莎莎女婿陳振邦就透露曾經煮過一次飯，為咗同太太郭詩慧慶生，特地去揀同買蟹返屋企蒸，而佢就最鍾意食太太整嘅可樂雞翼喇！
卓妮