萬宜灣村展覽 傳承鄉思
【本報訊】戰後本港人口膨脹及多次鬧水荒，為解制水之苦，全港最大的西貢萬宜水庫於六十年代籌建，歷時約十年完工，距今超過四十年，自此沉入水底的萬宜灣村及沙咀村只留下地名。年過九旬的老村民陳木勝年輕時赴英謀生，見識過世界、退休後依然選擇歸根故土，但半世紀鄉思今日只能水陸分隔，只靠着故人故物勉強拼湊。
膝下三代 對故鄉無記憶
卅幾歲離村的陳伯當年「喺倫敦落腳，之後轉到利物浦同曼徹斯特打工，到後來仲開咗間唐餐館！」但人離鄉，難忘的始終是故里，「我哋嗰間屋係最靚o架，兩層高村屋，但依家都喺水塘底！」在村內出世的陳伯自嘲為「正正式式嘅鄉下仔」，但遺憾膝下三代人對故鄉都沒甚記憶，「唔識講客家話，只係有時會指住舊相，話佢哋知呢度係舊屋！」
村民上樓 舊物搬去祠堂
當年住了陳、李、萬、鄒四姓人的客家古村，隨之被安置到西貢舊墟「上樓」，農耕生活隨着故里沉入水底。兩村元老及年輕一代早前透過口述歷史、翻查族譜及搜集舊照文物，將這段逐漸湮沒的歷史重現人前，在前萬宜灣鄉立學校舉行「水中故鄉四十年展覽」，娓娓道出大王爺做冬風俗、戰時記憶以至搬村往事等。
展覽也展出蜂籠、打穀桶、劏豬刀及瓦缸等舊物，不少由七十五歲的鄒悅芳捐出，「（搬村）嗰陣唔知有冇用，上咗樓又冇地方擺，個個都唔要，呢啲僅餘嘅就搬咗去祠堂！」自幼失去雙親的鄒伯十二歲離村「流浪」，做過五金舖、開過農場，「十七歲儲到二千蚊水腳就去英國搵食，嗰陣做泥水一日先搵到兩蚊，兩千蚊夠買兩層樓！」大半生人離鄉闖蕩，但兒時回憶似是昨日，鄒伯十年前回到西貢生活，仍然盼將萬宜灣村的記憶傳承下去。