得道多助，失道寡助。漢奸黎旗下壹傳媒計劃推出「假自僱、真裁員」外判方案，全城一致鬧爆，連向來同漢奸黎沆瀣一氣嘅記協同職工盟，都要出嚟噏番兩句人話，可想而知群情有幾咁激憤！
前排本報記者被漢奸黎爆粗問候娘親兼涉嫌恐嚇，記協半句譴責都冇，主席更一直龜縮，搞到被人揶揄係「香港淫媒協會」，今次點都要爭取番少少印象分。不過睇真啲份聲明，話就話對淫媒堅持推行外判政策「感到遺憾」，但跟手又話協助會員審視外判合約及提供改善建議，咁即係點，唔通記協暗啞抵贊同淫媒轉外判？
職工盟就醒目得多嘞，雖然聲明中忍唔住都要擦吓漢奸黎鞋，吹噓淫媒一向「以敢言著稱」，但仍有狠批淫媒逃避僱主基本責任，「呼之則來揮之則去」，將員工「推落大海」。之但係做戲做全套，佢哋平時最鍾意拉隊踩場抗議，今次為表示大義滅親嘅決心，好應該由收開漢奸黎秘密捐款嘅秘書長李卓人親自帶隊狙擊喇，吓話！
嗱，唔理整色整水抑或不情不願，大是大非前，即使係淫媒養起嘅「外圍組織」都要企出嚟表態，反觀勞工處至今粒聲唔出，淨係表示「關注」就算，最多都只係設立求助熱線，口惠實不至，仲有冇再不負責任啲吖！
大家有眼見，之前亞視熄機，勞工處除咗為失業員工提供協助，仲將違規老闆告將官去，今次漢奸黎逼員工「假自僱」，擺明想慳番遣散費、長服金以至強積金對沖，勞工處反而冇主動跟進，特別係處長陳嘉信，到依家都未蒲頭，好似人間蒸發咁，難怪被網民「全城通緝」。正所謂不近情者多藏奸，除非陳處長同漢奸黎有親，又或者有咩把柄畀人揸住，否則冇理由鵪鶉成咁，到底當中有咩景轟，令人浮想聯翩。
講到呢度，大家應該知點解漢奸黎唔留喺香港坐鎮，反而拿拿臨仆過去台灣撲火，梗係有人計過度過，香港勞工處根本唔敢郁佢一條頭髮，咪坐定粒六，有恃無恐囉。一節見則百節知，無論係爛果報侵權、漢奸黎黑金醜聞抑或係幕後策動違法佔領行動，當局咁多年嚟都係縱容縱容再縱容，就係因為港府長期姑息養奸，漢奸黎賊膽先至愈養愈大。
真係諗極都唔明，漢奸黎開到聲要「搵人搞」本報記者，我哋尚且未驚過；港府對付漢奸洋奴賣港賊，學北大人話事偈，要法律有法律，要槍有槍，要炮有炮，背後仲有駐港解放軍做「堅強後盾」，點解仲係首鼠兩端，縮窒縮窒？話唔係「懼外症」病入膏肓，講出嚟都冇人信！