政情：見報率低 鄺俊宇連任有難度
作為政治人物，知名度同見報率可以話非常重要。有民主黨（白鴿黨）中人為黨內七名立法會議員近半年嘅見報率進行統計，發現見報率最低嘅係愛情小說作者鄺俊宇。有人就笑稱，鄺俊宇因為着重喺網上寫小說而忽略做政策，更加有人擔心佢網上支持度唔可以轉化為選票，分分鐘只可做一屆議員喎。
白鴿黨中人爆料指，該黨曾經就黨內多名立法會議員包括鄺俊宇嘅見報率做統計，結果包尾嘅就係鄺俊宇。再深入睇有關報道，鄺俊宇主要關注醫療失誤議題，另外都有啲保護動物及社福議題，雖然普遍係讚多過彈，但數量始終唔夠多。
跟進嘅政策唔多
有白鴿中人對呢個結果唔感意外，因為鄺俊宇跟進嘅政策唔多，所以見報會較少。不過亦有人擔心見報率咁少，或會影響佢連任機會。話時話，佢喺上次選舉中成為「超級區議會票王」，因住沖昏頭腦吖。