政情：陳振彬痛風發作 有得睇冇得食
香港人鍾意享受美食，唔少人都有被稱為「富貴病」嘅痛風。早前喺一個飯局上，見到有侍應為觀塘區議會主席陳振彬（Bunny）遞上美食時，佢就不停耍手擰頭，轉頭將成碟嘢畀咗人哋食。Bunny樣樣都唔啱食，唔講仲以為佢減緊肥，其實係痛風發作。
Bunny話，早幾日太為食，下午先同朋友去食牛肉同埋青、白兩色露筍，夜晚又大擦生蠔，食得極開心。不過後來就痛風發作，連揸筆同揸筷子都會痛。
要飲番一個禮拜瘦肉湯
其實痛風喺香港都相當普遍，Bunny就話自己對痛風都唔係咁敏感，只要飲番一個禮拜百合煲瘦肉湯就自自然然會冇事喎！但係偏偏佢最鍾意食貝殼類海鮮同埋飲龍蝦湯，睇怕佢都係要食得清淡啲，戒一戒口喇！