政情：換屆交接 譚志源 吳得掂高下立見

吳自誇超額完成教育政綱

吳得掂五年任期劣迹斑斑，民望長期包尾，更因勤於外訪而被嘲為「旅遊局長」。吳得掂尋日接受電台訪問時，竟然自誇教育政綱係超額完成，仲為自己辯護，指現時政治凌駕教育，先令到任內嘅教育政策被拖慢步伐。好似反國教風波，係因個別人士炒作，喺無實質證據支持下，將國教同洗腦「扣死」。至於中史列為初中必修科嘅爭議，佢就話問題係點樣以生活化、趣味化嘅教學方式，去令到學生能夠古今並重，又講到唔關佢事咁。

吳得掂其後更唔客氣咁話，現屆政府將業界爭取逾廿年嘅免費幼稚園教育落實，印證自己並非政府負累喎。不過吳得掂數得一項工作去證明自己，說服力真係好有限囉。再者，如果佢真唔係政府嘅負累，又唔見佢有得過渡到下一屆政府？

對比之下，譚志源就踏實得多。佢出席另一活動時講明已經同候任政制及內地事務局局長聶德權會面，並開展交接工作，佢向對方講定七月份同埋下半年喺立法會同地區嘅工作，聽落就幾有交代喇。

佢亦細數及為未完成嘅政策進行分類。政制方面，未來或會有立法會補選工作同司法覆核案件、選舉制度嘅技術性改動，而內地事務則有三個聯絡處即將開幕、粵港澳大灣區規劃等。佢更提醒話國務院將會喺今年第四季審議大灣區規劃，聶德權未來或需花長時間去跟進。

見譚志源講到井井有條，畀足心理準備對方，同吳得掂真係有着天淵之別。相信新班子上場後，聶德權比候任教育局局長楊潤雄會輕鬆得多囉！