中環出更：同旅遊界踢友誼賽 梁志祥省四粒領立會大勝
立法會足球隊過往打友誼賽嘅戰績一般，尋日終於吐氣揚眉。立法會足球隊同香港旅遊業界尋日喺小西灣運動場比賽，立法會隊罕有地以六比三大勝。今次立法會隊入波唔再係靠晒外援，而係由六十歲嘅立法會議員梁志祥獨挑大樑，一人射入四球，果然寶刀未老。
場波喺時晴時雨嘅天氣下舉行。上半場一開波，旅遊業隊先入一球，不過立法會隊好快就追平。議員梁國雄都好肉緊出擊，點知射唔入，反被隊友議員陸頌雄取笑，話佢射波同拉布一樣徒勞無功。後來梁志祥因罰球有得射十二碼入波，上半場二比二打和。
下半場，旅遊業隊又係先入一球，立法會隊處於下風，多得梁志祥連入三球追回。完場前十五分鐘，立法會隊再入一球，以六比三大勝。梁志祥解釋話最鍾意落雨踢波，不過佢都畀高帽隊友戴，話係隊員好波，交波交得靚佢先入到喎。
姚思榮着「會衫」撐場
旅遊業界議員姚思榮都有去撐場，但係佢唔跟旅遊業隊着粉紅戰衣，佢笑稱因為依家喺立法會出糧，梗係着立法會衫喇！姚思榮又話，前年去內地踢咗場兩岸三地聯誼賽時跌傷膊頭，之後已經好少踢波，依家多數係同體育界議員馬逢國喺立法會健身室做運動，仲話已同議員陳健波、陳振英組成「健身四人組」添！
立法會足球隊隊長何俊賢都有落場，仲獲太太特登由元朗屋企嚟支持，然後兩人再一齊返元朗出席地區活動，聽落都甜到漏，點知何俊賢話自己嚴重被監視喎！
卓妮