中環出更：梁兆基自爆餐蛋麵都唔識煮
男主外女主內過咗氣好耐，烹飪叻嘅除咗坊間一眾美女廚神之外，男士煮餸都可以一鳴驚人。之不過，卓妮尋日喺一個活動上見到滙豐銀行亞太區顧問梁兆基，佢就自爆唔識煮嘢，笑言煮個餐肉雞蛋麵，都可以煮到啲麵「淋晒」。
香港銀行公會同東華三院旗下社會企業「煮餸易CookEasy」合作推出「餸」暖關愛社區計劃，呢個計劃係銀行公會贊助該社企聘用殘疾人士製作營養均衡、款式多樣嘅新鮮餸菜包，再由銀行公會義工親手將餸菜包送給獨居長者及低收入家庭。
李鋈麟十歲就識處理食材
銀行公會署理主席龔楊恩慈、梁兆基同東華三院主席李鋈麟，尋日一齊為活動主持啟動禮。見到社企員工即場示範製作餸菜包嘅時候，梁兆基笑言自己對於煮餸真係一竅不通，又透露甚少下廚，煮麵都煮得唔好食，不過唔緊要，每個人都有自己嘅專長，煮嘢食唔得啫，但佢喺銀行界打滾咁多年更加唔簡單。
不過，李鋈麟就對烹飪甚感興趣，講起下廚即眉飛色舞，頭頭是道。原來佢自細屋企開雜貨店，令佢對豉油醬醋等調味料非常熟悉，加上當時父親幫好多買完餸的家傭配搭調味料，好似整薑葱煀鯉同五柳鯇魚要用乜嘢配料等，整整吓仲索性幫一班客人買埋餸，好似團購咁，有時父親買完啲豬肺就叫佢洗，所以佢由十歲起已經熟晒點樣處理食材同調味料。
鍾意食又鍾意煮嘅佢仲話以前煮五柳鯇魚嘅時候整來整去都好韌，後來發現原來只用鯇魚嘅外層好食好多，或者索性轉成老鼠斑，又會自己整薑葱蝦醬魚肚添！
卓妮