「老嫗力雖衰，請從吏夜歸。急應河陽役，猶得備晨炊。」詩聖杜甫筆下嘅石壕惡吏徵兵如狼似虎，連老婦都唔放過，查實香港班食環署惡吏都係一擔擔。七旬阿婆賣一蚊紙皮之嘛，出動五、六個人圍捕，又告阻街又告無牌販賣，冷血成咁，唔怪得畀人鬧爆喇。
又拉又鎖都未算，明明婆婆全副身家只有三十四蚊，居然畀人攞走三十蚊做擔保，食環署惡吏仲懶係皇恩浩蕩咁，話剩番四蚊夠搭兩程長者優惠喎，你話仲有冇再涼薄啲吖？人哋七老八十仲要出嚟日曬雨淋，好彩嘅一個鐘搵十元八塊，唔好彩分分鐘顆粒無收，為嘅只係自力更生，唔想靠政府救濟啫。子曰︰「惻隱之心，人皆有之。」食環署人員咁都狠得下心趕盡殺絕，難聽講句直頭禽獸不如！
好在官府無義，民間有情。短短幾日時間，大批善心市民有錢出錢，有力出力，捐手推車有之，幫手交罰款有之，雖然阿婆好有骨氣，係都唔肯接受外界援手，但已經清楚反映市民對呢班「港版城管」怨氣之大。可能見眾怒難犯啩，食衞局局長高永文尋日終於蒲頭解畫，聲稱會檢討食環署喺執法時，如何盡量做到情理兼備喎。
正所謂官僚靠得住，豬乸會上樹，更何況高永文呢位行將執包袱嘅官僚，更加係山草藥噏得就噏，完全唔使負責任，莫講話檢討執法制度，話食環署職員以後會幫埋長者手執紙皮都仲得！講真，食環署欺軟怕硬，專門揀弱者嚟恰，都唔係今時今日嘅事。早排有位年老清潔女工用清水沖洗污糟地面，被食環署票控，全城嘩然；再之前有無牌小販為食環署人員追捕，最終跳河浸死，更加引發天怒人怨，食環署係有心檢討嘅，一早做咗喇！
呢嗱，同樣係阻街或無牌販賣，部分食肆夜晚霸咗半條街，街坊投訴極食環署都當睇唔到；節日周末喺中環鬧市做外傭生意嘅南亞裔無牌小販，食環署職員更幾乎運路行咁滯。鬼咩，南亞漢五大三粗，容乜易畀人打番轉頭，之但係又要向上頭交數，咪搵阿婆阿伯開刀囉。
香港就係咁嘅嘞，法律面前，有啲人比另一啲人更平等。大家有眼見，被指係佔中最大金主及幕後黑手嘅壹傳媒老闆漢奸黎及大部分搞手仍然逍遙法外，特別係漢奸黎，話當局唔係懼外症發作，買咗佢背後嘅外部勢力怕，三歲細路都唔信。反觀怒掟漢奸黎豬雜一類無人照嘅平民百姓，判決從快從重，絕不手軟，如果唔係點「彰顯公義」吖。
法律係維護社會公義嘅最後防線，今時今日香港司法亂象叢生，成個社會是非混淆，邪氣高漲，想唔沉淪都幾難！