香港社會愈來愈反智，也愈來愈政治化，一個小三基本能力評估（ＢＣＡ）都搞到七國咁亂。鬼咩！人稱「吳得掂」嘅教育局局長吳克儉，冇心教育卻醉心環遊世界，五年任期外訪逾五十次，使咗三百幾萬元公帑，離港超過一百五十日，佢考察咗啲乜、對教育政策有乜幫助，相信冇乜人知，而在任期間佢對香港教育有乜貢獻，叫你是是但但噏一樣，恐怕難過解答數學難題「龐加萊猜想」。
ＢＣＡ是小三全港性系統評估（ＴＳＡ）的改良版，教育局早前話ＢＣＡ研究數據有助學校回饋學與教，資料不會用作評量學校的指標，故學校毋須額外操練。教育局既然用咗咁多公帑去改良ＴＳＡ，如果出嚟講解嘅係有志於教育嘅教育局局長，而唔係大部分人以為嘅「旅遊局局長」，推行起嚟，相信會冇咁棘手。可惜弱勢局長萬事哀，而基於「民無信不立」的箴言，改良後的ＢＣＡ依然有不少人反對。
不少反對派政客為了吸睛，也不理ＢＣＡ是否真的有改良，一味在立法會內叫囂，完全不知議事論事為何物。其實，既然ＢＣＡ啱啱推出，又何必立即一棍打死？而作為校長、老師、家長，應該理性啲，起碼看看出來的成效如何再作定論吧？
早前在立法會ＢＣＡ公聽會抗議的補習教師王曦彥和家長伍嘉儀，日前到曾參與ＢＣＡ試行計劃的一間學校示威，在門外掛上「罷考ＢＣＡ」標語及焚燒ＴＳＡ試卷，搞到校長要報警。香港號稱「民主」社會，而民主的精神是「我不認同你的說法，但我誓死捍衞你說話的權利」，佢哋嘅行為無疑係「做多咗」，你唔畀自己嘅仔女考冇問題，但何必到人哋學校鬧事呢？自佔領行動之後，香港社會禮崩樂壞，好似漢奸黎咁，郁吓就話要「搞人」，多咗啲咁嘅流氓惡棍，香港難有寧靜歲月，更遑論進步。