政情：多仔公鄭泳舜忘記父親節

今日就係父親節，相信唔少子女已經諗定節目同父親一齊慶祝。不過有「多仔公」之稱嘅深水埗區議員鄭泳舜（Vincent）竟然唔記得父親節，仲話未有慶祝活動喎，唔通佢同三個仔關係欠佳？

平日見Vincent笑容滿面，感覺都幾平易近人，但佢自揭返到屋企就會變得嚴肅，皆因要負起鬧仔嘅責任。不過佢就否認因此而影響到親子關係，仲話三個仔間中會借機撇甩媽咪同佢出街。照咁睇，可能三個仔想為佢送上驚喜，Vincent未知有咩慶祝活動啫！

Vincent就話，每年有太多節日需要慶祝，好似紀念日、生日等，所以自己將父親節嘅重要性放得比較低。不過諗番轉頭，佢係保良局前主席鄭錦鐘個仔，又點可以忘記父親節啫？