政情：選舉學校補鑊周浩鼎做反面教材

最近政圈鬧得熱烘烘嘅，不外乎係喺立法會調查特首梁振英收取UGL五千萬元專責委員會中，建制派立法會議員周浩鼎捲入打龍通事件，唔單止佢，佢所屬嘅政黨民建聯（民記）近期頻頻甩轆，唔知係咪為咗補鑊同改善議員質素，據聞佢哋近期大搞選舉學校，為黨內有意從政之士傳授政治知識咁話。

捲打龍通風波 進退失據

對於出事率極高嘅民記嚟講，橫額同宣傳品印錯字都算係小錯，佢哋嘅議員更加常有失言，好似立法會前議員鍾樹根就係佼佼者，曾自創多款金句，好似「雞毛鴨蒜」、「子烏虛有」等。另外，該黨嘅大埔區議員黃碧嬌日前因一句收到市民投訴，就被指為斬樹殺鷺鳥幫兇。雖然其黨友都同情佢遭遇，但就認為佢可以改進表達技巧去避免今次是非。

但講到最大件事，當然係周浩鼎捲入打龍通風波，佢喺過程中唔單止進退失據，仲要勞煩黨友「護駕」開會，更曾向傳媒拋下一句：「畀條路我行」，最終辭埋專責委員會嘅委員職務，民記開班授課，有人話佢應該變成反面教材，令黨員引以為鑑。

邀請公關教路 着重包裝

據了解，民記選舉學校已開學，目前只係上過幾堂，暫定一個星期於總部上堂一次。其實，周浩鼎都喺黨內浸咗好耐先上到位，咁都出事，可能有感單靠黨內元老同立法會議員授課都唔夠，所以選舉學校仲特登搵外援，邀請公關授課，着重包裝同形象，亦會特別教授女性化妝技巧。

不過，民記中人就話今次課程主要為黨內有意從政嘅社區主任開設，但亦吸引唔少區議員到場偷師。老實講，點講都係以人嘅質素為先，若果單靠包裝，只得個空殼，最終都係呃唔到人嘅。