中環出更：林貝聿嘉卸任婦協任內創舉不勝數
政府即將換屆，成立咗廿四年嘅香港各界婦女聯合協進會（婦協）亦將進行世紀交替。聽聞自創會以來即出任主席至今嘅林貝聿嘉即將卸任，交棒畀現任副主席何超瓊，咁大件事，卓妮梗係第一時間同林太求證。林太笑笑口證實，早前婦協已進行改選，新班子七月一日上任。佢笑言主席一職做足十二屆共廿四年，係時候交畀年輕人。
今次婦協八位主席及副主席之中，有逾半人退任，除咗林太之外，仲有前政務司司長唐英年嘅母親唐尤淑圻同埋東區區議會前主席丁毓珠等。回望過去廿幾年，林太自言好幸運，因為喺各界支持下，婦協發揮咗應有嘅作用及責任。
總部遷灣仔 獲「橋底皇后」稱號
佢細數任內嘅點滴，其中有幾項創舉及畫面最難忘。首先婦協將當時七、八十個各自為政嘅婦女會聯合起來，使婦女力量化整為零；仲有婦協成立時香港仍未回歸，但中英雙方均有代表出席，可以話係歷史一刻。林太又話婦協旗下設有十六個小組委員會，服務包羅萬有，其中「半邊天青年領袖培訓計劃」就累計培訓近二百位年輕女性作為未來接班人，佢哋仲創辦香港第一個女子管弦樂團添！
要數林太任內建樹，又點少得將灣仔駱克道鵝頸橋底改建為婦協總部，佢仲因此有個「橋底皇后」花名添！雖然卸任在即，但做過立法局議員同無數公職嘅林太，一講起公眾議題就好上心，形容佢係永不言休嘅社會活動家也不為過。林太就笑稱，卸任後佢就可以放下一半重擔，專心睇住佢創辦嘅灣仔體育總會就得喇！
卓妮