崩口人忌崩口碗。漢奸黎爆粗兼涉嫌恐嚇本報記者，食過佢狗餅嘅政客同組織，連日嚟爭相撲出嚟上演「義犬報恩」戲碼，但好似人稱「李漢奸」嘅李柱銘咁，護主變揭醜，就真係唔知好嬲定好笑嘞。
李漢奸今次廢噏啲乜？佢話喎，中央如果以管理澳門嘅方式管治香港，壹傳媒老闆漢奸黎「跪埋落地下」，反問咁係咪代表「一國兩制」成功？
呢啲咪哪壺不開提哪壺囉。係人都知漢奸冇腰骨，唔跪低唔通頂天立地咩？以漢奸界祖師爺秦檜為例，佢兩公婆喺杭州岳王廟嘅銅像，正正就係「跪埋落地下」嘅求饒造型。話時話，除咗杭州岳王廟，全國起碼仲有七個同類跪像，除咗造型外都有一個共通點，就係秦檜老婆王氏都會畀人「非禮」，胸部摸到滑一滑，他朝君體也相同，漢奸黎同李漢奸不可不察。
漢奸黎身後有冇人幫佢造跪像，大家不妨放長雙眼，但佢老哥生勾勾時其實已經卑躬屈膝，奴相畢現，只不過下跪對象唔係當今聖上，而係外部勢力咁解啫。呢嗱，佢早排去美國「朝聖」後，立即撰文吹捧特朗普，大讚對方政策，聲稱美國喺佢領導下「會再次強大起來」，肉麻當有趣，正如有人話齋，如果漢奸黎有幸獲特朗普召見，唔俯首稱臣，山呼萬歲至奇。
漢奸黎跪拜英美主子，李漢奸跪拜漢奸黎，呢個就係洋奴賣港賊嘅「啄食順序」(Pecking order)。咪睇李漢奸賣港資格更老，向洋主子表明心迹更冇底線，連「日日做漢奸」、「有需要時做漢奸」都噏得出，但講到喺洋主子心目中嘅分量同地位，點都唔及漢奸黎。好簡單，李漢奸同「民主阿婆」陳方安生之流已經係過晒氣嘅舊電池，睇吓佢哋近年頻頻上演越洋哭秦庭爛騷，接見層級一次比一次低，就知咩事。漢奸黎就唔同嘞，雖然壹淫媒經營不善，愈做愈縮，但畢竟叫做掌控輿論陣地，蠱惑人心，搞亂香港仲要借重佢哋，自然睇高一線。
大家有眼見o架，每逢「搞事四人幫」密謀亂港大計，總係由漢奸黎充當召集人，再齊集黎宅接柯打行事；仲有就係佔領落幕之際，一群政客將漢奸黎團團圍喺核心，其中李漢奸充當「左右護法」，一張群丑拱衞圖，勝過千言萬語。
始終都係魯迅講得啱，叭兒狗往往比牠的主人更嚴厲，李漢奸又好，反對派政客抑或記協都好，本質上都係食漢奸黎狗餅嘅奴才，奴才又點敢向主子「說不」呢？不過又講番轉頭，李漢奸今次講得一啲都冇錯，漢奸黎搞亂香港，惡貫滿盈，佢摺埋跪低之日，正是一國兩制真正成功之時！